Bosh prokuratura huzuridagi Departamentning To‘raqo‘rg‘on tumani bo‘limi, IIV va bojxona xodimlari hamkorligida “Namangan” YPX maskanida o‘tkazilgan tezkor tadbirda qonunga xilof ravishda tamaki mahsulotlari savdosi bilan shug‘ullanib kelgan fuqaro J.B.ning "Nexia" rusumli avtomashinasi to‘xtatilib ko‘zdan kechirilganda, avtomashina saloni va yukxonasida xorijda ishlab chiqarilgan umumiy bahosi 109,2 mln so‘mlik turli nomdagi jami 8 860 quti aksiz markasiz tamaki mahsulotlarini Toshkent shahariga sotish maqsadida olib ketayotganligi aniqlanib, ushbu tamaki mahsulotlari ashyoviy dalil sifatida olingan.
Mazkur holat yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda muomalaga kiritish yoki ishlab chiqarish) bilan jinoyat ishi qo‘zg‘atilib, tergov harakatlari o‘tkazilmoqda.
