2026-yil 14-oktyabr kuni Toshkentdagi “O‘zekspomarkaz” majmuasida Xitoy Xalqaro savdoni rivojlantirish kengashi tomonidan tashkil etilgan “Xitoy — Markaziy Osiyo (O‘zbekiston) 2026” ikkinchi savdo ko‘rgazmasi ochildi. Ochilish marosimida Xitoy Xalqaro savdoni rivojlantirish kengashining Qozog‘istondagi vakolatxonasi xodimi Liu Yue hamda O‘zbekiston Respublikasi Investitsiyalar, sanoat va savdo vazirligining XXR bilan hamkorlikni rivojlantirish boshqarmasi boshlig‘i Azamat Rahmonov ishtirok etdi.
2025–2026-yillar Xitoy va Markaziy Osiyo mamlakatlari o‘rtasidagi hamkorlikni sifat jihatidan rivojlantirish yillari deb e’lon qilingan. Mazkur ko‘rgazma Xitoy Xalqaro savdoni rivojlantirish kengashi tomonidan O‘zbekistonda ketma-ket ikkinchi yil o‘tkazilayotgan yirik savdo-iqtisodiy tadbirdir. Uning maqsadi — “Xitoy — Markaziy Osiyo” sammitida erishilgan kelishuvlarni izchil amalga oshirish, yangi davrda Xitoy va O‘zbekiston o‘rtasidagi har tomonlama strategik sheriklik munosabatlarini chuqurlashtirish, shuningdek, ikki mamlakat o‘rtasidagi savdo-iqtisodiy aloqalar va amaliy hamkorlikni izchil rivojlantirishdan iborat.
Bu yilgi ko‘rgazmada ilg‘or sanoat yo‘nalishlarida faoliyat yurituvchi korxonalarni ham o‘z ichiga olgan Xitoyning 200 ga yaqin yetakchi kompaniyasi ishtirok etmoqda. Ekspozitsiya aqlli ishlab chiqarish, yashil energetika, maishiy elektronika va xizmatlar savdosi kabi sohalarni qamrab olgan. Kompaniyalar Xitoyning texnologik innovatsiyalar va sanoatni rivojlantirish borasidagi yutuqlarini namoyish etmoqda.
Jumladan, China CAMC Engineering Co., Ltd. (CAMCE) xalqaro muhandislik va pudrat loyihalari, shuningdek, ishlab chiqarish quvvatlarini yaratish sohalaridagi hamkorlik natijalarini taqdim etmoqda. Yonyou Network Technology Co., Ltd. xalqaro bozorlar uchun mo‘ljallangan raqamli va intellektual yechimlarini namoyish qilmoqda. Focus Technology Co., Ltd. transchegaraviy elektron tijorat va tashqi savdo sohalaridagi barcha bosqichlarni qamrab oluvchi xizmatlarini taqdim etmoqda. Lanxin Robotics kompaniyasi sanoat uchun mo‘ljallangan mobil robotlar bilan tanishtirayotgan bo‘lsa, LAISAI intellektual lazerli joylashtirish va belgilash tizimlari, shuningdek, muhandislik-geodeziya o‘lchov tizimlarini namoyish etmoqda.
Ixtisoslashgan, yuqori texnologiyali va innovatsion korxonalar, shuningdek, rivojlanish darajasi yuqori hamda noyob vakolatlarga ega kompaniyalarning ulushi 30 foizdan oshadi. Taqdim etilgan ishlanmalar Xitoy korxonalarining texnologik innovatsiyalar, raqamli transformatsiya va sanoatni modernizatsiya qilish borasidagi so‘nggi yutuqlarini yaqqol namoyon etmoqda.
Ko‘rgazma ekspozitsiyasining umumiy maydoni 4 800 kvadrat metrni tashkil etadi. Unda beshta ixtisoslashtirilgan mavzuli hudud hamda Xitoyning milliy qiyofasini namoyish etishga mo‘ljallangan “Xitoy imkoniyatlari” maxsus ekspozitsiyasi tashkil etilgan. Ushbu hududlarda sifatli Xitoy mahsulotlari, ilg‘or texnologiyalar va ustuvor tarmoqlar hamda hamkorlik yo‘nalishlaridagi xizmatlar keng namoyish qilinmoqda.
Yetakchi korxonalar va ixtisoslashgan mahsulotlar ishlab chiqaruvchilarining bir maydonda jamlanishi ikki mamlakat kompaniyalari o‘rtasidagi sanoat kooperatsiyasini chuqurlashtirish uchun qulay sharoit yaratmoqda. Shuningdek, bu ishlab chiqarish zanjirining barcha bosqichlarida muvofiqlashtirilgan rivojlanish va o‘zaro hamkorlikka asoslangan sheriklik ekotizimini shakllantirishga xizmat qilmoqda.
Ko‘rgazma doirasida Xitoy va O‘zbekiston investitsiyaviy hamkorligi forumi ham bo‘lib o‘tdi. Unda ikki mamlakat savdo-sanoat palatalari, tarmoq uyushmalari va korxonalari vakillari ishtirok etdi. Forum qatnashchilari o‘zaro fikr almashib, hamkorlik masalalarini atroflicha muhokama qildilar. Bundan tashqari, Xitoy va O‘zbekiston kompaniyalari uchun biznesdan biznesga (B2B) formatida tarmoqlar kesimidagi maxsus muzokaralar tashkil etilmoqda.
Mazkur tadbirlar korxonalar va xaridorlar o‘rtasida to‘g‘ridan-to‘g‘ri hamda samarali aloqa kanallarini yaratib, talab va taklifni aniqroq muvofiqlashtirish, shuningdek, yangi ishbilarmonlik aloqalarini yo‘lga qo‘yishga yordam bermoqda.
Ko‘rgazma Xitoy va O‘zbekiston o‘rtasidagi savdo-iqtisodiy hamkorlikni chuqurlashtirish hamda o‘zaro aloqalarni mustahkamlash yo‘lidagi muhim qadamlardan biri bo‘ldi. Xitoy Xalqaro savdoni rivojlantirish kengashi ikki mamlakat ishbilarmon doiralari o‘rtasida ko‘prik vazifasini bajarishda, savdo-iqtisodiy axborot almashinuvini rivojlantirishda hamda raqamli iqtisodiyot, yangi energiya manbalari va aqlli ishlab chiqarish kabi sohalarda hamkorlikning yangi salmoqli natijalariga erishishga ko‘maklashishda davom etadi.
Bu esa Xitoy va Markaziy Osiyo mamlakatlari o‘rtasida yanada yaqin taqdir hamjamiyatini shakllantirish hamda “Bir makon, bir yo‘l” tashabbusini yuqori sifat darajasida birgalikda amalga oshirishga qo‘shimcha turtki beradi.
Ko‘rgazma 16-oktyabrga qadar davom etadi. Uning doirasida qo‘shimcha tadbirlar, jumladan, Xitoyning Shensi provinsiyasi va Shinjon-Uyg‘ur avtonom rayoni bilan savdo-iqtisodiy hamkorlik hamda aloqalarga bag‘ishlangan uchrashuvlar ham o‘tkazilishi rejalashtirilgan.
