Buxoro neftni qayta ishlash zavodida ishlab chiqarilgan AI-92 markali benzin narxi arzonlashtirildi. Bu haqda “Oʻzbekneftgaz” matbuot xizmatiga tayanib "Xalq so‘zi" nashri veb sayti xabar qildi.
Qayd etilishicha, ushbu avtobenzinning birja savdolaridagi 1 tonnasi boshlangʻich narxi birinchi bosqichda 12 million 881 ming soʻmdan 12 million 628 ming soʻmga tushirildi. Bu esa oʻz navbatida, 1 litr AI-92 rusumidagi avtobenzinning birjadagi boshlangʻich narxi 9 400 soʻm degani.
“Oʻzbekneftgaz” ichki bozorni rivojlantirish va isteʼmolchilar manfaatlarini qoʻllab-quvvatlash maqsadida yuqori oktanli yoqilgʻi narxlarini bosqichma-bosqich pasaytirish ishlarini davom ettiradi", deyiladi kompaniya xabarida.
Bu harakatlar prezidentning aholini arzon va sifatli yoqilgʻi mahsulotlari bilan taʼminlash boʻyicha bergan topshiriqlari ijrosi doirasida, benzin ishlab chiqarish hajmini koʻpaytirish evaziga narx kamaytirildi.
Avvalroq kompaniya joriy yilning sentyabr oyidan AI-80 benzini ishlab chiqarishni toʻliq toʻxtatmoqchiligi toʻgʻrisida xabar qilingandi. 2026-yildan faqat yuqori oktanli avtobenzin sotuviga oʻtish reja qilingan.
