2026-yil 17–18-iyul kunlari Bishkek shahrida Qirg‘iziston raisligi ostida Shanxay hamkorlik tashkiloti Yoshlar kengashining XIX yig‘ilishi bo‘lib o‘tdi.
Yig‘ilishning ochilish marosimida Qirg‘iziston Vazirlar Mahkamasi raisi o‘rinbosari U. Mamatkanov hamda Madaniyat, axborot va yoshlar siyosati vazirining birinchi o‘rinbosari S. Nadirbekov so‘zga chiqdi.
SHHTga a’zo davlatlar vakillari yoshlar hamkorligini rivojlantirishning ustuvor yo‘nalishlarini muhokama qildilar. Jumladan, gumanitar almashinuvlarni kengaytirish, qo‘shma loyihalarni amalga oshirish hamda yoshlar tashkilotlari o‘rtasidagi hamkorlikni mustahkamlash masalalariga alohida e’tibor qaratildi.
SHHT Bosh kotibi o‘rinbosari Pyao Yanfan Qirg‘izistonning SHHT Yoshlar kengashiga raisligi davridagi faoliyatini yuksak baholab, tadbirlar dasturi mazmunan boy bo‘lganini ta’kidladi. U yoshlar tashkilotga a’zo davlatlarning strategik rivojlanish resursi, shuningdek, Yevrosiyo hududida yaxshi qo‘shnichilik va o‘zaro anglashuvni mustahkamlashning muhim omillaridan biri ekanini qayd etdi.
Ta’kidlanishicha, bugungi kunda SHHTning yoshlar kun tartibi raqamli texnologiyalar, muhandislik ijodkorligi, innovatsiyalar, turizm va tadbirkorlik kabi istiqbolli yo‘nalishlarni qamrab olmoqda. Bu yondashuv a’zo davlatlarning tashkilotni modernizatsiya qilish va ko‘p tomonlama hamkorlik samaradorligini oshirish borasidagi siyosatiga mos keladi.
Tadbirlar doirasida SHHT Yoshlar turizm forumi ham o‘tkazildi. Unda yoshlar turizmini rivojlantirish, xususan, ekoturizm va alpinizmni ommalashtirish, tabiiy hamda madaniy merosni asrab-avaylash, shuningdek, yoshlar o‘rtasidagi almashinuvlarni kengaytirish masalalari muhokama qilindi.
