Bogʻchaga imtiyozli navbatga turish uchun onlayn ariza berish imkoni yaratildi. Bu haqiqda Taʼlim nazorati Telegram-kanali xabar berdi.
Maʼlum qilinishicha, endilikda bogʻchaga imtiyozli navbatga turish jarayoni “my.gov.uz” orqali toʻliq avtomatlashtirilgan.
“Arizani onlayn topshirish uchun roʻyxatdan oʻzingizga tegishli toifani tanlasangiz kifoya — tizim barcha maʼlumotlarni vazirlik va idoralarning axborot bazalari orqali soniyalar ichida oʻzi tekshiradi”, — deyiladi xabarda.
Kimlar “my.gov.uz” orqali imtiyozli navbatga qoʻyiladi?
Shartnoma boʻyicha harbiy xizmatchilar, ichki ishlar va bojxona organlari xodimlarining farzandlari;
I va II guruh nogironligi boʻlgan shaxslarning bolalari;
Yetim yoki ota-ona qaramogʻidan mahrum boʻlgan bolalar;
“Ayollar daftari”ga kiritilgan yolgʻiz ayollarning bolalari;
Akalari yoki opalari ushbu bogʻchaga qatnayotgan bolalar;
Koʻp tarmoqli ixtisoslashtirilgan bogʻchalardan umumiy turdagi muassasalarga oʻtkazilayotgan sogʻaygan bolalar;
Kam taʼminlangan oilalarning farzandlari;
Oila aʼzolari nogironligi boʻlgan shaxslardan iborat oilalar bolalari;
Boquvchisini yoʻqotgan oilalarning bolalari;
Toʻrt va undan koʻp farzandi bor oilalar bolalari;
Talabalarning farzandlari;
Maktab, OTM, texnikum, kollej va akademik litseylar pedagoglarining bolalari.
Uydan chiqmay ariza yuborish uchun:
“my.gov.uz” portali yoki mobil ilovasida roʻyxatdan oʻting;
bolani davlat mTaktabgacha taʼlim tashkilotlariga qabul qilish xizmatini tanlang;
soʻralgan maʼlumotlarni toʻldiring, bogʻchani hamda mavjud imtiyozingizni belgilab, ariza yuboring.
