Markaziy Osiyo mamlakatlari ommaviy axborot vositalari vakillari Shinjon-Uyg‘ur avtonom rayonidagi Boro-Tala Mo‘g‘ul avtonom okrugining Jingxe tumani hamda Alashanko‘ va Bole shaharlarida bo‘lishdi. Tashrif dasturidan turizm obyektlari, qishloq xo‘jaligi korxonalari, logistika markazlari va transchegaraviy elektron tijorat maydonchalarini ko‘zdan kechirish o‘rin oldi.
Safar davomida jurnalistlar Bole shahridagi Aliyonbay turistik qishlog‘iga ham tashrif buyurishdi. U yerda mehmon uylari faoliyati, mahalliy taomlar bilan tanishib, hududda turizm sohasini rivojlantirish istiqbollari yuzasidan fikr almashishdi. Shuningdek, Xinjiang Tianlai Agriculture and Animal Husbandry Group kompaniyasiga tashrifdan so‘ng Qozog‘istonning «Argumenti i fakti» gazetasi jurnalisti Oleg Belov korxonada yo‘lga qo‘yilgan to‘liq ishlab chiqarish sikli modeli chorvachilik tarmog‘ini modernizatsiya qilayotgan Qozog‘iston kompaniyalari uchun ham qiziqarli tajriba bo‘lishi mumkinligini ta’kidladi.
Press-tur ishtirokchilarining alohida e’tiborini Xitoy–Qozog‘iston chegarasidagi eng yirik transport-logistika markazlaridan biri bo‘lgan Alashanko‘ shahri tortdi. Osiyodagi eng yirik yopiq konteyner terminalida jurnalistlar xalqaro yuk tashish tizimi hamda Xitoy–Yevropa va Xitoy–Markaziy Osiyo yo‘nalishlari infratuzilmasi bilan yaqindan tanishishdi.
Mezbon tomon ma’lumotiga ko‘ra, Alashanko‘ chegara o‘tkazish punkti orqali ushbu yo‘nalishlarda bugunga qadar 55 mingdan ortiq yuk poyezdi harakatlangan. Mazkur o‘tish punkti uzoq yillardan buyon yuk tashish hajmi bo‘yicha Xitoyning eng yirik quruqlik portlaridan biri hisoblanadi.
Press-tur ishtirokchilari transchegaraviy yuk tashuvlarida faoliyat yuritayotgan haydovchilarga xizmat ko‘rsatish uchun tashkil etilgan Xitoy–Qozog‘iston xalqaro haydovchilar uyida ham bo‘lishdi. O‘zbekistonning Farg‘ona viloyati telekanali jurnalisti Axrorjon Ziyatov an’anaviy xitoy madaniyati namunalari bilan tanishib, Pekin operasi niqoblarini bezash bo‘yicha mahorat darsida ishtirok etdi.
Alashanko‘ transchegaraviy elektron tijorat parkida OAV vakillari logistika va bojxona mexanizmlari, shuningdek, xalqaro savdo platformalarining faoliyat yuritish xususiyatlarini o‘rgandilar.
Safar yakunida jurnalistlar Xitoy va Markaziy Osiyo davlatlari o‘rtasidagi qishloq xo‘jaligi, chorvachilik, elektron tijorat, transport va logistika sohalaridagi hamkorlikka bag‘ishlangan materiallar tayyorladilar.
Tojikistonning «Iqtisodiyot» jurnali jurnalisti Mazbut Qosimovning ta’kidlashicha, Boro-Tala Mo‘g‘ul avtonom okrugi o‘zining chegara hududida joylashganidan samarali foydalanib, Markaziy Osiyo davlatlari bilan hamkorlikni rivojlantirish hamda savdo-iqtisodiy aloqalarni kengaytirish yo‘lida faol ish olib bormoqda.
