Ijtimoiy tarmoqlarda Namangan shahri hududida yirik yongʻin boʻlayotgani aks etgan videotasvirlar keng tarqaldi. Mazkur holat yuzasidan viloyat Favqulodda vaziyatlar boshqarmasi maʼlumot berdi.
Unda aytilishicha, bugun, 4-fevral kuni soat tungi 02:46 da Namangan shahar, “Shodlik” MFY, Toʻraqoʻrgʻon koʻchasida joylashgan MCHJ binosida yongʻin boʻlayotganligi toʻgʻrisida viloyat FVBga murojaat kelib tushgan.
Mazkur murojaatga asosan yongʻin qutqaruv ekipaji soat 02:52 da etib borib, soat 02:57 da yongʻin oʻrab olingan va soat 03:45 da toʻliq oʻchirilgan.
Favqulodda vaziyatlar boshqarmasi taqdim qilgan maʼlumotga koʻra, ushbu yongʻin natijasida binoning shift tom qismidan 90 kv.m. maydoni yonib zararlangan. Yongʻin oqibatida kuyish, tan jarohati olish holatlari aniqlanmagan.
