13-Xalqaro „Ipak yo‘li“ kinofestivali 19–23-sentabr kunlari Xitoyning Shensi provinsiyasidagi Sian shahrida bo‘lib o‘tadi. Tadbir sanalari festival oldidan o‘tkazilgan matbuot anjumanida tasdiqlandi. Festival tashkilotchilari — Xitoy Media guruhi, Shensi va Futszyan provinsiyalari hukumatlari.
Xalqaro „Ipak yo‘li“ kinofestivali 2014-yildan buyon „Bir makon, bir yo‘l“ tashabbusida ishtirok etuvchi mamlakatlar o‘rtasidagi madaniy hamkorlik doirasida o‘tkazib kelinmoqda. Bu yil tashkilotchilar xalqaro va mavzuli dasturlarni kengaytirib, bolalar kinosi, xorijiy kinofestivallar bilan hamkorlik, kino bozori hamda yosh mutaxassislarni tayyorlashga alohida e’tibor qaratdi.
May oyida arizalar qabul qilina boshlaganidan buyon tanlovga 139 mamlakat va hududdan 2130 ta film kelib tushdi. Bu festival tarixidagi ishtirokchilar geografiyasi bo‘yicha eng yuqori ko‘rsatkich bo‘ldi.
Dasturda ilk bor „Ipak yo‘li bolalari — Bolalar kinosi mavsumi“ bo‘limi paydo bo‘ldi. Tashkilotchilar dunyoning turli mamlakatlaridan 60 dan ortiq bolalar filmini jamladi, ulardan 15 tasi asosiy dasturga kiritildi. Bo‘lim doirasida bolalar kinosini rivojlantirish va xalqaro hamkorlikka bag‘ishlangan namoyishlar hamda tadbirlar o‘tkaziladi.
Bu yil festivalning faxriy mehmon mamlakati Misr bo‘ladi. Sianda Misr filmlari namoyish etilib, mavzuli munozaralar tashkil qilinadi. Shuningdek, Xalqaro „Ipak yo‘li“ kinofestivali va Qohira xalqaro kinofestivali hamkorlik to‘g‘risida bitim imzolaydi.
Iyul oyida Qohirada Xitoy va Misr g‘arbiy kinosi haftaligi bo‘lib o‘tgan edi. U festival oldidan o‘tkazilgan tadbirlardan biri bo‘ldi.
Festival doirasida filmlarni ayirboshlash va targ‘ib qilishga bag‘ishlangan tadbirlar, „Ipak yo‘li“ xalqaro kino ayirboshlash va savdo markazining ochilishi, mualliflik huquqlarini onlayn savdoga chiqarish platformasining ishga tushirilishi hamda hamkorlik to‘g‘risidagi bitimlarni imzolash marosimlari ham rejalashtirilgan.
Kino bozorida Xitoy, Turkiya, Vengriya, Ispaniya va boshqa mamlakatlar kompaniyalari ishtirokida kino ishlab chiqarish, xalqaro qo‘shma loyihalar va madaniy almashinuv sohasidagi loyihalar namoyish etiladi.
Tanlov va biznes dasturi
Tanlov dasturining markaziy qismi „Oltin Ipak yo‘li“ mukofoti bo‘ladi. Bu yil badiiy, hujjatli va animatsion filmlar uchun alohida xalqaro hakamlar hay’atlari shakllantirildi. Xalqaro hakamlar hay’atiga „Oskar“ mukofoti sovrindori, operator Bao Deysi raislik qiladi.
Badiiy filmlar hakamlar hay’ati tarkibidan Ispaniya, Kolumbiya, Indoneziya va Xitoy kinoijodkorlari o‘rin olgan. Hujjatli filmlarni Italiya va Xitoy mutaxassislari baholaydi. Animatsiya yo‘nalishidagi hakamlar hay’atiga esa Misr, Ispaniya va Xitoy vakillari kirgan.
Badiiy filmlar bo‘limida sakkizta mukofot, jumladan, eng yaxshi film, rejissura, ssenariy, aktyorlik mahorati va operatorlik ishi uchun mukofotlar, shuningdek, hakamlar hay’atining bosh sovrini ta’sis etilgan. Hujjatli va animatsion filmlar uchun ham alohida mukofotlar beriladi. Bundan tashqari, kino san’atini rivojlantirishga qo‘shgan hissasi uchun maxsus mukofot ta’sis etilgan.
Festivalning biznes dasturi xalqaro hamkorlik, mualliflik huquqlarini sotish, kino va turizm integratsiyasi, shuningdek, yangi texnologiyalardan foydalanish masalalarini qamrab oladi. Kino industriyasining rivoji, AIGC texnologiyalaridan foydalanish, virtual reallik, mikroseriallar va boshqa yo‘nalishlarga bag‘ishlangan munozaralar o‘tkaziladi.
Yosh kinoijodkorlarga ham alohida e’tibor qaratilgan. Bir qator oliy ta’lim muassasalari bilan hamkorlikda tashkil etilgan yoshlar investitsiya va loyihalar dasturiga kino va televideniye sohasidagi 573 ta loyiha kelib tushdi. Festival doirasida yosh ijodkorlarning taqdimotlari, qisqa metrajli filmlar namoyishi, ma’ruzalar va ijodiy guruhlar bilan uchrashuvlar o‘tkaziladi.
Kin namoyishlari
Kin namoyishlari 16–23-sentabr kunlari bo‘lib o‘tadi. Jami 400 dan ortiq film namoyish etilishi rejalashtirilgan. Dastur kinoteatrlar, onlayn platformalar, ochiq maydonlar va maktablardagi namoyishlarni qamrab oladi.
Kinoteatrlarda qariyb 300 ta seansda 150 ta film namoyish etiladi. Onlayn dasturga 130 ta film kiritilgan bo‘lib, tashkilotchilar ma’lumotiga ko‘ra, ularni provinsiyaning qariyb 16 million aholisi tomosha qilishi mumkin.
Ochiq maydonlarda 111 ta namoyish nuqtasi tashkil etiladi. Shundan to‘qqiztasi Sianda, 102 tasi esa provinsiyaning boshqa shaharlarida joylashadi. Jami 361 ta bepul seans o‘tkaziladi.
Maktab dasturi 15 ta ta’lim muassasasini qamrab oladi. Unda nomoddiy madaniy merosga bag‘ishlangan hujjatli filmlar namoyish etiladi. Bundan tashqari, hamyonbop kino namoyishlari dasturi doirasida 40 ta film tanlab olinib, 80 ta maxsus seans chegirmali narxlarda o‘tkaziladi.
Ayrim namoyishlardan oldin ekspertlar ma’ruza qiladi, seanslardan so‘ng esa film ijodkorlari bilan uchrashuvlar tashkil etiladi. Shuningdek, nogironligi bo‘lgan shaxslar uchun to‘siqsiz kirish imkoniyati yaratilgan xayriya namoyishlari ham rejalashtirilgan.
Festival Sianning shahar madaniyati va turizm infratuzilmasi bilan ham bog‘liq bo‘ladi. 16–23-sentabr kunlari shaharda to‘rtta mavzuli maydon faoliyat yuritadi, 600 dan ortiq obyekt festival tomoshabinlari uchun maxsus takliflar tayyorlaydi.
Dasturda shaharning 13 ta savdo majmuasi ham ishtirok etadi. Tashrif buyuruvchilar festival namoyishlariga chiptani taqdim etgan holda chegirmalar va maxsus takliflardan foydalanishlari mumkin. Hamkor maydonlar haqidagi ma’lumotlarni o‘z ichiga olgan elektron xarita ham yaratilgan.
