3–7 avgust kunlari davlat xizmatchilari va jurnalistlardan iborat O‘zbekiston delegatsiyasi Urumchi va Qashg‘arga tashrif buyurdi. Safar haqidagi hisobotni "Xinjiang Daily" nashri e’lon qildi. Tashrif davomida delegatsiya a’zolari korxonalar, sanoat obyektlari, turar joy majmualari va madaniyat muassasalarida bo‘lib, hududning rivojlanishi hamda turli sohalardagi mahalliy tajriba bilan tanishdi.
Logistika va savdo
Urumchidagi Xalqaro quruqlik porti hududida delegatsiya Xitoy — Yevropa yuk poyezdlari yo‘nalishlari va transport koridorlarini rivojlantirish istiqbollari bilan tanishdi.
O‘zbekiston Milliy axborot agentligi jurnalisti N. Mardanov quruqlikdagi transport yo‘nalishlarini rivojlantirish O‘zbekiston uchun ham muhim ahamiyatga ega ekanini ta’kidladi.
«Urumchi xalqaro quruqlik porti hududini barpo etish tajribasi e’tiborga loyiq va O‘zbekiston uchun ham foydali bo‘lishi mumkin», — dedi u.
Delegatsiya a’zolari Xinjiang Huayuan Holding Group Co., Ltd. tarkibiga kiruvchi «Yindolan» Shinjon farmatsevtika kompaniyasida an’anaviy xitoy va milliy tibbiyot preparatlarini ishlab chiqarish, shuningdek, dorivor xomashyoni yetishtirishdan tortib mahsulot ishlab chiqarish va ilmiy tadqiqotlargacha bo‘lgan to‘liq ishlab chiqarish jarayoni bilan tanishdi.
O‘zbekiston Tashqi ishlar vazirligi matbuot xizmatining birinchi kotibi A. Mamadjanov korxonadagi aylanma suv ta’minoti tizimiga e’tibor qaratdi. Uning so‘zlariga ko‘ra, suv resurslari taqchilligini boshdan kechirayotgan O‘zbekiston uchun suvni tejash va qayta foydalanish tajribasi qiziqish uyg‘otadi.
Shahar muhiti
Urumchidagi Guyuan syan turar joy majmuasida delegatsiya aholiga ko‘rsatiladigan xizmatlar, jumladan, keksalar va bolalarga yordam berish, maishiy nizolarni hal etish, shuningdek, madaniy va sport tadbirlarini tashkil etish tizimi bilan tanishdi.
O‘zbekiston Mahallalar uyushmasi vakili Sh. Rahimov bunday loyihalarni moliyalashtirish hamda aholining murojaatlari bilan ishlash mexanizmlari bilan qiziqdi.
«Mahalliy hamjamiyatlar darajasida ishlarni tashkil etish bo‘yicha bu tajriba haqiqatan ham o‘rganish va foydalanishga loyiq», — dedi u.
Delegatsiya, shuningdek, «Shinjonning terrorizm va ekstremizmga qarshi kurashi» ko‘rgazmasida bo‘lib, unda terrorchilik va ekstremistik faoliyat oqibatlari hamda uning oldini olish bo‘yicha ko‘rilayotgan choralar haqidagi materiallar bilan tanishdi.
O‘zbekiston Tashqi ishlar vazirligi departamentining uchinchi kotibi T. Shamsiyev:
"Xavfsizlik va barqarorliksiz hech qanday rivojlanish haqida gapirish mumkin emas. Shinjonda ijtimoiy barqarorlikni ta’minlash borasidagi amaliyot e’tirofga loyiq", — dedi.
Qashg‘ar: madaniyat va qishloq xo‘jaligi
Qashg‘arda delegatsiya Iyd Kah masjidi va shaharning tarixiy qismini kompleks saqlash va rivojlantirish memorial muzey majmuasiga tashrif buyurdi. Mehmonlar tarixiy inshootlarni asrab-avaylash hamda hududdagi diniy hayot bilan tanishdi.
Delegatsiya cho‘llanishga qarshi kurash masalasiga ham alohida e’tibor qaratdi. Yupuho uyezdining Davakun hududidagi o‘rmonzorlashtirish maydonida mehmonlar himoya o‘rmonzorlari va unga tutash hududlarda amalga oshirilayotgan qishloq xo‘jaligi loyihalarini ko‘zdan kechirdi.
Jashi uyezdidagi "Lutszyan sin" qishloq xo‘jaligi texnologiyalarini rivojlantirish kompaniyasi hamda olxo‘rining yangi navlarini yetishtirishga ixtisoslashgan "Yue-Jia" zamonaviy sanoat parkida delegatsiya vakillari seleksiya, qishloq xo‘jaligi brendlarini rivojlantirish va mahalliy aholi daromadlarini oshirish masalalarini o‘rgandi.
O‘zbekiston Mahallalar uyushmasi vakili N. Sarayev safardan qaytgach, ko‘rganlari haqida hamkasblariga so‘zlab berish va ushbu tajribani O‘zbekistonda qo‘llash imkoniyatlarini o‘rganish niyatida ekanini bildirdi.
"Biz ushbu tajribadan O‘zbekiston qishloq xo‘jaligi mahsulotlarining sifati va qo‘shilgan qiymatini oshirishda foydalanishni istardik", — dedi u.
Kelgusidagi hamkorlik uchun tajriba
Bir necha kun davomida delegatsiya a’zolari Shinjondagi rivojlanishning turli yo‘nalishlari — transport va sanoatdan tortib, qishloq xo‘jaligi, shahar muhiti hamda madaniy merosni asrab-avaylashgacha bo‘lgan sohalar bilan tanishdi.
Delegatsiya vakillari transport koridorlari, suvni tejovchi texnologiyalar, qishloq xo‘jaligi mahsulotlarini qayta ishlash va mahalliy hamjamiyatlar darajasida boshqaruv sohalarida kelgusida tajriba almashishga qiziqish bildirdi.
Jurnalistlar esa safar yakunlari bo‘yicha materiallar tayyorlab, O‘zbekiston auditoriyasiga zamonaviy Shinjon va Xitoy haqidagi taassurotlarini yetkazishni rejalashtirmoqda.
