Toshkentning qator hududlarida Mirzo Ulug‘bek tumanidagi suv taqsimlash inshootida rejali profilaktika ishlari o‘tkazilishi munosabati bilan 3 avgust kuni soat 10:00 dan 4 avgust kuni soat 10:00 gacha ichimlik suvi taʼminoti vaqtincha to‘xtatiladi.
Taʼmirlash ishlari davomida mutaxassislar beshta magistral zadvijkani almashtirishni rejalashtirgan.
Suv taʼminoti korxonasi maʼlumotiga ko‘ra, cheklovlar 22 ta mahalla, 884 ta ko‘p qavatli turar joy, 7006 ta xususiy xonadon hamda 242 ta davlat va ijtimoiy muassasani qamrab oladi. Umuman olganda, suv taʼminotining vaqtincha to‘xtatilishi 33 mingdan ortiq aholiga taʼsir qiladi.
Taʼmirlash ishlari davomida zarar ko‘rgan hududlarga ichimlik suvi maxsus avtotsisternalar orqali yetkazib beriladi.
Kommunal xizmatlar aholiga zarur miqdordagi ichimlik suvini oldindan zaxira qilib qo‘yishni tavsiya qildi.
Ichimlik suvi taʼminoti vaqtincha to‘xtatiladigan manzillar ro‘yxati, shuningdek, suv yetkazib berish jadvali suv taʼminoti korxonasining rasmiy axborot manbalarida eʼlon qilingan.
