30-iyun kuni Indoneziya poytaxti Jakarta shahrida "Global sivilizatsiya tashabbusi va Chjen Xe ruhining xalqaro targ‘iboti" mavzusida xalqaro seminar bo‘lib o‘tdi.
Tadbirda Xitoy va Indoneziyadan 60 dan ortiq olim, professor-o‘qituvchi, talaba hamda ekspertlar ishtirok etib, sivilizatsiyalar muloqoti, gumanitar almashinuv va buyuk dengizchi Chjen Xe merosining bugungi kundagi ahamiyatini muhokama qildi.
Seminar Yunnan viloyati Xalq hukumati Matbuot xizmati hamda Yunnan viloyati Tashqi ishlar idorasi tomonidan tashkil etilgan "Chjen Xe – do‘stlik elchilari" madaniy tadbirlari turkumi doirasida o‘tkazildi.
Ishtirokchilar ta’kidlashicha, bundan olti asrdan ortiq avval amalga oshirilgan Chjen Xe sayohatlari xalqlar o‘rtasidagi tinchlik, ochiqlik va o‘zaro hurmat timsoliga aylangan. Ekspertlar ushbu qadriyatlar Buyuk ipak yo‘li ruhi bilan hamohang bo‘lib, bugungi kunda ham Osiyo davlatlari o‘rtasidagi hamkorlikni rivojlantirishda muhim ahamiyat kasb etishini qayd etdi.
Muhokamalar davomida Xitoy va Indoneziyaning ta’lim, madaniyat, barqaror rivojlanish hamda gumanitar almashinuv sohalaridagi hamkorligi misollar bilan yoritildi. Mutaxassislar qo‘shma ilmiy tadqiqotlar, akademik hamkorlik va tajriba almashish xalqlar o‘rtasidagi o‘zaro anglashuvni mustahkamlash hamda sivilizatsiyalararo muloqotni rivojlantirishga xizmat qilishini ta’kidladi.
Forumda umumiy tarixiy merosni zamonaviy raqamli texnologiyalar yordamida asrab-avaylash masalasiga ham alohida e’tibor qaratildi. Ishtirokchilar ko‘p tilli raqamli arxivlarni yaratish, qo‘shma ilmiy loyihalarni rivojlantirish va Chjen Xe merosi hamda Buyuk ipak yo‘li tarixini o‘rganish bo‘yicha xalqaro hamkorlikni kengaytirishni taklif qildi.
Forum doirasida, shuningdek, "China Newsweek" jurnalining Janubiy Osiyo nashri huzurida "Davrlar ko‘prigi" xalqaro kommunikatsiyalar bo‘yicha xalqaro ekspertlar hamjamiyati tashkil etilgani e’lon qilindi. Uning tarkibiga Xitoy, Indoneziya, Shri-Lanka, Nepal va boshqa davlatlardan 20 nafardan ortiq ekspert kirdi. Yangi platforma xalqaro kommunikatsiyalarni rivojlantirish, gumanitar almashinuvni kengaytirish hamda Osiyo mamlakatlari madaniyatlarini o‘zaro o‘rganishga ko‘maklashishni maqsad qilgan.
Forum yakunida ishtirokchilar Chjen Xe merosini asrash va ommalashtirish Osiyo mamlakatlari o‘rtasidagi do‘stlik, o‘zaro ishonch va madaniy hamkorlikni yanada mustahkamlashiga, shuningdek, Buyuk ipak yo‘li an’analarini zamonaviy davrda davom ettirishga xizmat qilishiga ishonch bildirdi.
