Parlamentda koʻrib chiqilgan qonun Markaziy Osiyo mamlakatlari va Xitoy oʻrtasidagi mintaqaviy hamkorlikni mustahkamlash, siyosiy muloqot, iqtisodiy rivojlanish, transport va kommunikatsiyalar, investitsiyalar, energetika, taʼlim, madaniy-gumanitar sohalardagi hamkorlikni yanada rivojlantirishga xizmat qiladi.
Nizom Markaziy Osiyo-Xitoy formati doirasida Kotibiyatning maqsadlari, mexanizmlari va hamkorlik yoʻnalishlarini belgilaydi. Xususan, Kotibiyat hamkor davlatlar oʻrtasidagi kelishuvlarni muvofiqlashtirishda, amaliy loyihalarni samarali amalga oshirishda va muloqot uchun doimiy platforma yaratishda muhim rol oʻynaydi.
Nizomni ratifikatsiya qilish Oʻzbekistonning mintaqaviy integratsiya jarayonlarida ishtirokini kuchaytiradi va mintaqaviy iqtisodiy, investitsiya, infratuzilma, transport va logistika sohalarini rivojlantirishga, yangi yoʻlaklarni yaratishga va savdo aylanmasini oshirishga hissa qoʻshadi.
Parlament aʼzolari qonunning qabul qilinishini Oʻzbekistonning mintaqaviy hamkorlik boʻyicha tashabbuslarini amalga oshirish va Markaziy Osiyo-Xitoy formati doirasida konstruktiv muloqot va amaliy sheriklikni yanada mustahkamlashda muhim qadam deb atashdi.
Markaziy Osiyo-Xitoy formati kotibiyati 2023-yil may oyida boʻlib oʻtgan birinchi sammitda imzolangan Sian deklaratsiyasi asosida tomonlar oʻrtasidagi hamkorlikni va tegishli mexanizmlarning ishlashini har tomonlama rivojlantirish maqsadida tashkil etilgan.
