Bugun Pekin shahrida O‘zbekiston Ijtimoiy himoya milliy agentligi va Xitoy Fuqarolik ishlari vazirligi delegatsiyalari o‘rtasida uchrashuv bo‘lib o‘tdi. Bu haqda "Dunyo" axborot agentligi xabar berdi.
Foto: "Dunyo" AA
Qayd etilishicha, uchrashuvda agentlik direktori Mansurbek Olloyorov yolg‘iz keksalar uchun mobil xizmatlarini tashkil etish, mahalla darajasida xizmatlarni rivojlantirish va ijtimoiy qo'llab-quvvatlashni raqamlashtirish bo'yicha hamkorlikni boshlashni taklif qilgan.
Agentlik direktorining birinchi o'rinbosari Shahnoza Mirziyoyeva mamlakatlarimiz o'rtasidagi munosabatlar rivojlanib borayotganini alohida ta'kidlab, bolalar va imkoniyati cheklangan shaxslarni ijtimoiy himoya qilish sohasida o'zaro tajriba almashishdan manfaatdorligini bildirdi.
Uchrashuv yakunida O‘zbekiston va Xitoy o‘rtasida ijtimoiy himoya sohasidagi hamkorlikni rivojlantirishga qaratilgan o'zaro anglashuv memorandumi imzolandi.
Shuningdek, Xitoy tomoni 2025-yilda Samarqand shahrida bo‘lib o‘tadigan "Ijtimoiy himoya: Barqaror rivojlanish va tenglik sari yo‘l" mavzusidagi Butunjahon konferensiyasida ishtirok etishga taklif etildi.