Shu kunlarda Sirdaryo viloyati hokimi Akmaljon Mahmudaliyev boshchiligidagi delegatsiya Xitoyda bo‘lib turibdi. Xizmat safari uchrashuv, samimiy va do‘stona ruhda o‘tgan muzokaralarga boy bo‘lmoqda. Bu haqda O‘zbekiston milliy axborot agentligi xabar berdi.
Dastlab Xitoydagi O‘zbekiston elchixonasida Baodin shahri Szinsyu tumani partiya kotibi Szya Juyshen, Langfang tumani sanoat federatsiyasi vitse-prezidenti Chen Guydje va 15 ga yaqin mahalliy tadbirkor bilan uchrashuv o‘tkazildi. Muloqot davomida tomonlar iqtisodiy-gumanitar, investitsiyaviy, turizm hamda kambag‘allikdan chiqarish sohalaridagi hamkorlik masalalarini ko‘rib chiqdi.
Foto: Uza.uz
Uchrashuvlarda, shuningdek, “Xian neuron technology” kompaniyasi bilan qiymati 10 million dollarlik ikki, uch g‘ildirakli elektr moped va skuterlar ishlab chiqarish loyihasi, “Beijing Linfu Technology” kompaniyasi bilan 10 million dollarlik biotexnologik genom laboratoriyasini tashkil etish loyihasi va “Jin Bi Sheng” kompaniyasi bilan 2 million dollarlik parrandachilik majmuasini qurish loyihasi atroflicha muhokama qilindi.
Foto: Uza.uz
“Shaanxi Jiazhongshenghe Agricultural Technology” kompaniyasi bilan foydalanishdan chiqqan yerlarni o‘zlashtirish va o‘g‘it ishlab chiqarish, “Taitong Transport” kompaniyasi bilan logistika markazi barpo qilish, “Celco Innovation Technology” kompaniyasi bilan akkumulyator va invertorlar ishlab chiqarish bo‘yicha kelishuvlarga erishildi.
Foto: Uza.uz
Shu yerning o‘zida Xitoyda tahsil olayotgan talabalar bilan ham uchrashuv tashkil qilindi. Unda yoshlarning muammolari, o‘qish va yashash sharoitlari, kelgusi rejalari borasida fikr almashildi. Ularning taklif va tashabbuslarini o‘rganib, amaliyotga tatbiq etish uchun mas’ullar biriktirildi.
Foto: Uza.uz
Viloyat vakillari Pekin iqtisodiy-texnologik rivojlanish hududida joylashgan klinik tibbiy tadqiqotlar va tibbiy asboblar uchun reagentlar ishlab chiqarishga ixtisoslashgan “Thorgene Medical Technology” hamda sanoat mahsulotlari ishlab chiqaruvchi va o‘zining elektron sotuv platformasiga ega “Xinfangsheng Holding Group” kompaniyalari faoliyati bilan ham tanishdilar.