O‘zbekiston elchisi Baxtiyor Ibragimov Qozog‘iston Moliya vazirligi qoshidagi Davlat daromadlari qo‘mitasi raisi Jandos Duysembiyev bilan uchrashdi, deb xabar qilmoqda "Dunyo" AA muxbiri.
Suhbat avvalida Jandos Duysembiyev O‘zbekiston va Qozog‘iston o‘rtasidagi izchil sur’atlarda rivojlanayotgan savdo-iqtisodiy munosabatlarning ijobiy dinamikasini ta’kidladi.
Muzokaralar davomida bojxona tartibotlarini soddalashtirish, bojxona axborot tizimlarini uyg‘unlashtirish, zamonaviy logistika markazlarini qurish, shuningdek, yuk tashish va yetkazib berishda vaqt hamda moddiy xarajatlarni kamaytirish uchun chegara o‘tish punktlarini modernizatsiya qilish masalalari ko‘rib chiqildi.
Gʻishtko‘prik (O‘zbekiston) – Jibek Joli (Qozog‘iston) va Davut-ota (O‘zbekiston) – Tajen (Qozog‘iston) asosiy chegara o‘tkazish punktlarida ta’mirlash ishlarini tezlashtirish orqali savdo hajmini va turizm ko‘rsatkichlarini oshirish bo‘yicha amalga oshiriladigan chora-tadbirlar yuzasidan fikr almashildi.
Sirdaryo viloyati hududida tashkil etilayotgan Xalqaro sanoat kooperatsiyasi markazi yaqinida joylashgan Sirdaryo–Atameken chegara o‘tkazish punkti infratuzilmasini zamonaviy talablar asosida modernizatsiya qilish masalasiga alohida e’tibor qaratildi.
Tomonlar meva-sabzavot va boshqa tez buziladigan yuklarni tashishda qulayliklar yaratish, ularning tezkor harakatlanishini ta’minlash maqsadida "yashil yo‘lak" tizimini joriy etish istiqbollarini muhokama qildilar.
Bo‘lib o‘tgan uchrashuv O‘zbekiston va Qozog‘iston o‘rtasidagi savdo-iqtisodiy, logistika va transchegaraviy hamkorlikni kengaytirish, ikki davlat o‘rtasidagi tovar aylanmasi va transport-tranzit salohiyatini oshirishga qaratilgan amaliy chora-tadbirlarni belgilab olishda muhim ahamiyat kasb etdi.