2024-yil 11-oktyabr kuni Qirg‘iziston poytaxti Bishkek shahrida yangi tashkil etilgan "Xitoy – Qirg‘iziston – O‘zbekiston" Temir yo‘l kompaniyasi MCHJishtirokchilarining birinchi yig‘ilishi bo‘lib o‘tdi.
Shuni taʼkidlash kerakki, ushbu kompaniya Qirg‘iziston Respublikasi qonunchiligiga muvofiq 2024 yil mart oyida Xitoy – Qirg‘iziston – O‘zbekiston temir yo‘lini qurish loyihasini amalga oshirish uchun tashkil etilgan. Yangi kompaniya faoliyati Xitoy – Qirg‘iziston – O‘zbekiston temir yo‘lini moliyalashtirish, loyihalash, qurish, foydalanish va taʼmirlashga qaratilgan.
Birinchi yig‘ilishda kompaniya boshqaruviga taalluqli bir qator muhim masalalar yuzasidan qarorlar ko‘rib chiqildi va qarorlar qabul qilindi. Ishtirokchilar direktorlar kengashi aʼzolarini sayladilar va jamiyat ijroiya organi rahbarlarini tayinladilar.
Shuningdek, moliyalashtirish masalalari muhokama qilinib, joriy yilga mo‘ljallangan investitsiya rejasi tasdiqlandi.
Ushbu muhim voqea mintaqaning transport infratuzilmasini sezilarli darajada yaxshilash va Markaziy Osiyo mamlakatlari o'rtasidagi iqtisodiy aloqalarni mustahkamlashga qaratilgan keng ko'lamli xalqaro loyihani amalga oshirish yo'lidagi yana bir qadamdir.