Korrupsiyaga qarshi kurashish agentligi UzAutoMotors oʻtkazgan 1,3 mlrd soʻmlik davlat xaridida qonun buzilish holatini aniqladi. Bu haqda "Xalq so‘zi" nashri veb saytida xabar qilindi.
Foto: xs.uz
Qayd etilishicha, ijtimoiy tarmoqlarda UzAutoMotors tomonidan 8-iyul kuni oʻtkazilgan 1,3 mlrd soʻmlik davlat xaridida affillangan shaxslar ishtirok etib, gʻolib boʻlganligi yuzasidan xabarlar eʼlon qilingan.
Keltirilgan holatlar yuzasidan agentlik tomonidan oʻtkazilgan oʻrganishda ushbu xarid jarayonida ishtirok etgan tadbirkorlik subyektlarining rahbar va taʼsischilari yaqin qarindosh ekanligi, shu bois mazkur jamiyatlar affillangan shaxslar hisoblanishi maʼlum boʻlgan.
Xarid komissiyasi tomonidan yuqoridagi davlat xaridlarini amalga oshirishda Oʻzbekiston Respublikasi “Davlat xaridlari toʻgʻrisida”gi qonunning bir qator talablari buzilganligi sababli buyurtmachiga xarid natijalarini bekor qilish haqida taqdimnoma kiritildi.
Oʻrganish jarayonida toʻplangan hujjatlar aybdor shaxslarga qonuniy chora koʻrish uchun huquqni muhofaza qiluvchi organga yuborildi, deyiladi xabarda.