foto:uza.uz
O‘zbekiston Respublikasi Prezidenti “Tahliliy va tadqiqotchilik faoliyatini tashkil qilish bo‘yicha qo‘shimcha chora-tadbirlar to‘g‘risida” qaror qabul qildi.
Unga muvofiq, tahliliy va tadqiqot tuzilmalari faoliyatini tashkil qilish bo‘yicha muvofiqlashtiruvchi kengash huzurida alohida yuridik shaxs maqomiga ega bo‘lmagan Tadqiqotlarni qo‘llab-quvvatlash jamg‘armasi tashkil etiladi.
Jamg‘arma mablag‘lari O‘zbekiston Respublikasi Tiklanish va taraqqiyot jamg‘armasida alohida ochilgan hisobraqamlarda jamlanadi va Muvofiqlashtiruvchi kengash tomonidan belgilangan tartibda sarflanadi.
Quyidagilar Jamg‘arma mablag‘larini shakllantirish manbalari hisoblanadi:
- O‘zbekiston Respublikasi Tiklanish va taraqqiyot jamg‘armasining 25 million AQSH dollari miqdoridagi bir martalik beg‘araz to‘lovi;
- xalqaro, xorijiy va mahalliy tashkilotlarning grantlari va homiylik mablag‘lari;
- Jamg‘armaning vaqtincha bo‘sh turgan mablag‘larini tijorat banklari depozitlariga joylashtirishdan tushadigan daromadlar;
- qonunchilik hujjatlarida taqiqlanmagan boshqa manbalar.
Jamg‘arma mablag‘lari quyidagilarga yo‘naltiriladi:
- Muvofiqlashtiruvchi kengashning faoliyat yo‘nalishlari bo‘yicha tadqiqotlarni amalga oshirish;
- tahliliy materiallarni tayyorlash va tadqiqotlarni o‘tkazish uchun grantlar ajratish;
- ekspertlik, tadqiqotga oid va boshqa xizmatlarni ko‘rsatuvchi mahalliy va xorijiy jismoniy va yuridik shaxslar xizmat haqi uchun to‘lovlarni amalga oshirish;
- tahlil va tadqiqot yo‘nalishida tuzilgan vaqtinchalik loyiha guruhlari faoliyatini moliyalashtirish;
- ijtimoiy so‘rovlar va jamoatchilik fikrini o‘rganish bo‘yicha tadqiqotlarni amalga oshirish;
- tahlilchilar va mutaxassislarni o‘qitish va ularning malakasini oshirish;
- nashrlar, adabiyotlar, ma’lumotlar bazalari va tadqiqotlar natijalarini tayyorlash va xarid qilish hamda ularga obuna bo‘lish;
- ilmiy-tadqiqot sohasidagi konferensiyalar va boshqa tadbirlarni tashkil qilish hamda ularning ishida ishtirok etish xarajatlarinish;
- Muvofiqlashtiruvchi kengashning faoliyatini qo‘llab-quvvatlash bo‘yicha boshqa xarajatlarni qoplash.
Jamg‘arma mablag‘lari maqsadli va samarali sarflanishi ustidan nazorat Muvofiqlashtiruvchi kengash tomonidan amalga oshiriladi.