O‘zbekiston Respublikasining 2020-yil 8-iyuldagi «Ov qilish va ovchilik xo‘jaligi to‘g‘risida»gi 627-sonli Qonuniga muvofiq, joriy yilning 1-martidan 15-avgustga qadar ov mavsumi yopiladi. Bu vaqtda yovvoyi hayvonlar va qushlarni ovlash qat'iy taqiqlanadi. Bu haqda Ekologiya vazirligi xabar qildi.
Qayd etilishicha, ov qoidalarini buzish, xususan, taqiqlangan davrda ov qilish qonunchilikka ko‘ra qat'iy javobgarlikka sabab bo‘ladi.
Ekologiya, atrof-muhitni muhofaza qilish va iqlim o‘zgarishi vazirligi yurtdoshlarimizdan ov mavsumi tugagan davrda tabiatga yanada ehtiyotkorona munosabatda bo‘lishlarini so‘raydi.
"Noqonuniy ov bilan bog‘liq holatlarga duch kelsangiz, vazirlikning 1157, 1207, (71) 207-11-07 va (71) 207-11-08 telefon raqamlari, ecogovuz_bot telegram boti orqali yoki tegishli hududiy boshqarmalarga murojaat qiling!" deyiladi vazirlik xabarida.