Olti toifadagi ma’lumotlar O‘zbekiston davlat xizmatchilarining deklaratsiyalarida oshkor etilishi majburiy bo‘lishi rejalashtirilmoqda, shu bilan birga, 20 tasi yopiqligicha qoladi. Qonun loyihasiga oid tuzatishlarni ishlab chiqishni may oxirigacha yakunlash topshirildi.
O‘zbekistonda davlat xizmatchilarining daromadlari va mol-mulkini deklaratsiya qilish to‘g‘risidagi qonun loyihasini takomillashtirish rejalashtirilmoqda. Bu prezidentning 21-apreldagi farmonida belgilangan bo‘lib, unda 5-mart kuni Korrupsiyaga qarshi kurashish milliy kengashining kengaytirilgan yig‘ilishida belgilangan normativ-huquqiy hujjatlarni qabul qilish ko‘zda tutilgan.
Hujjatda deklaratsiyalash subyektlari va obyektlari, aks ettiriladigan ma’lumotlar ro‘yxati, deklaratsiyalarni taqdim etish shakli va tartibi, shuningdek, ularni tekshirish mexanizmi belgilanadi.
Tuzatishlar may oyining oxirigacha ishlab chiqilishi kutilmoqda. Ishlab chiqish uchun Korrupsiyaga qarshi kurashish agentligi, Adliya vazirligi va Bosh prokuratura mas’ul hisoblanadi.
Qaysi ma’lumotlar oshkor qilinadi, qaysilari yo‘q?
Korrupsiyaga qarshi kurashish milliy kengashi yig‘ilishida oltita toifadagi ma’lumotlarni majburiy oshkor qilishni nazarda tutuvchi o‘zgartirishlar kiritish topshirilgan:
-
deklarantning familiyasi, ismi, otasining ismi;
-
turmush o‘rtog‘i va voyaga yetmagan farzandlari to‘g‘risidagi ma’lumotlar;
-
ish joyi va egallab turgan lavozimi;
-
jami yillik daromad;
-
ko‘chmas mulk obyektlari;
-
transport vositalari.
Bunda 20 ta toifadagi ma’lumotlar, jumladan, yashash joyi, qishloq xo‘jaligi va xususiy amaliyotdan olingan daromadlar, qimmatli qog‘ozlarga egalik qilish, pul mablag‘lari va omonatlar, olingan meros, bazaviy hisoblash miqdorining 200 baravarigacha (75 mln so‘m) miqdordagi sovg‘alar, gonorarlar, BHMning 100 baravarigacha (37,5 mln so‘m) miqdordagi pul mukofotlari, yutuqlar va boshqalar oshkor etilmaydi.
Deklaratsiya har yili 1-aprelga qadar “Deklaratsiya” elektron axborot tizimi orqali taqdim etiladi.
Deklaratsiyalanayotgan mol-mulk to‘g‘risidagi ma’lumotlar tashkilotlarning tegishli ma’lumotlar bazalari orqali avtomatik ravishda integratsiya qilinadi.
Korrupsiyaga qarshi kurashish agentligi deklaratsiyalash sohasidagi vakolatli organ bo‘ladi, tekshiruvlar o‘tkazadi va ma’lumotlarning ochiq qismini o‘z rasmiy veb-saytida e’lon qiladi.