Samarqand viloyati Payariq tumanida issiqxonada 221 tup giyohvandlik oʻsimligini yetishtirib kelayotgan shaxs qoʻlga olindi. Bu haqda viloyat Ichki ishlar boshqarmasiga tayanib "Xalq so‘zi" nashri veb sayti xabar berdi.
Foto: Samarqand viloyati IIB
Qayd etilishicha, joriy yilning 23-iyun kuni Samarqand viloyati IIB Giyohvandlik va psixotrop moddalarning noqonuniy muomalasiga qarshi kurashish boʻlimi hamda Payariq tumani IIB xodimlari tomonidan maxsus-profilaktik tadbir oʻtkazilgan.
Tadbir davomida Jomboy tumanida roʻyxatda turib, vaqtincha Payariq tumani Polvonariq mahallasida yashovchi fuqaroning hovlisida joylashgan issiqxonada 221 tup giyohvandlik oʻsimligi yetishtirib kelinayotgani maʼlum boʻlgan.
Ushbu issiqxonaning ichki qismi koʻzdan kechirilganda u yerda ogʻirligi 1 kg boʻlgan quritilgan holdagi giyohvandlik moddasi ham saqlab kelinayotganligi aniqlangan va u tegishli tartibda hujjatlashtirilib olingan.
Hozirda mazkur holat yuzasidan tergovga qadar tekshiruv harakatlari olib borilmoqda.