O‘zbekistonlik mutaxassislar Xitoy poytaxti Pekinda bo‘lib o‘tgan Xitoy–Markaziy Osiyo ortopediya va reabilitatsiya sohasidagi akademik almashinuv dasturida ishtirok etdi. Tadbir Pekin universitetining Uchinchi shifoxonasi bazasida tashkil etildi.
Uchrashuv davomida O‘zbekiston va mintaqaning boshqa davlatlari mutaxassislari Xitoylik hamkasblari bilan bo‘g‘imlar jarrohligining zamonaviy usullari hamda reabilitatsiya texnologiyalarini rivojlantirish masalalarini muhokama qilishdi. Ayniqsa, bemorlarni tiklash jarayonida raqamli yechimlardan foydalanishga alohida e’tibor qaratildi.
Xitoy tomoni “diagnostika – davolash – reabilitatsiya – profilaktika” integratsiyalashgan modelini hamda bemorni klinikadan tortib uy sharoitigacha kuzatib borishga imkon beruvchi “raqamli reabilitolog” tizimini taqdim etdi.
O‘zbekiston mutaxassislarining ushbu tadbirda ishtiroki ikki davlat o‘rtasida sog‘liqni saqlash sohasidagi professional aloqalarni mustahkamlash va hamkorlikni kengaytirishga xizmat qilmoqda.
