O‘zbekiston Respublikasi Prezidenti Shavkat Mirziyoyev topshirig‘iga asosan, afg‘on xalqiga 169 tonnadan ortiq zarur oziq-ovqat mahsulotlari ortilgan navbatdagi insonparvarlik yuklari karvoni “Ayritom” chegara o‘tkazish punkti orqali qo‘shni mamlakatning Balx viloyatiga yetkazildi. Bu haqda Surxondaryo viloyati hokimligi ma'lum qildi.
Foto: Surxondaryo viloyati hokimligi telegram kanali.
Insonparvarlik yordami tarkibidan 48 tonna un, 48 tonna bug‘doy, 15 tonna o‘simlik yog‘i, 10 ming 80 dona konservalangan go‘sht mahsulotlari , 22 tonna makaron, 24 tonna shakar hamda 100 ming dona tez tayyorlanadigan lapsha o‘rin olgan.
Foto: Surxondaryo viloyati hokimligi telegram kanali.
Shu munosabat bilan Hayraton shahridagi Astras kompaniyasi hududida Surxondaryo viloyati hokimi Ulug‘bek Qosimov, O‘zbekiston Respublikasi tashqi ishlar vazining o‘rinbosari Erkin Hamrayev va Afg‘onistonning Balx viloyati gubernatori Muhammad Yusuf Vafo hamda ikki tomon rasmiylari ishtirokida insonparvarlik yordamini topshirish marosimi bo‘lib o‘tdi.
Foto: Surxondaryo viloyati hokimligi telegram kanali.
Tadbirda so‘z olgan Balx viloyati rasmiylari Prezidentimiz va xalqimizga og‘ir paytda ko‘rsatilayotgan yordam uchun minnatdorlik bildirishdi. Birodar ikki xalqqa farovonlik tilab duolar qilindi.