Rossiyalik talaba Ilya Popov, Xitoyda yetti yildan buyon yashab, tahsil olib kelmoqda. U noodatiy tajriba o'tkazishga qaror qilib, kiyim va poyabzal tanlashni Xitoyning Doubao sun'iy intellekt ilovasiga ishonib topshirdi.
Dastur unga kiyimlarni bir-biriga moslashtirish bo'yicha bir nechta variantni taklif qildi. Shundan so'ng talaba tavsiya etilgan obrazlarni yig'ib, ularni amalda sinab ko'rdi. Uning aytishicha, tanlangan kombinatsiyalar ancha muvaffaqiyatli chiqqan va kundalik foydalanish uchun juda mos bo'lgan.
Ilya ta'kidlashicha, Xitoyda zamonaviy texnologiyalar nafaqat ta'lim va ish jarayonlarida, balki kundalik hayotda ham tobora kengroq qo'llanilmoqda. Uning fikricha, sun'iy intellektga asoslangan xizmatlar turli vazifalarni hal etishda odatiy va qulay vositaga aylanib bormoqda.
Mazkur video xorijiy ijtimoiy tarmoq foydalanuvchilarida katta qiziqish uyg'otdi hamda sun'iy intellekt texnologiyalarining kundalik hayotda qanday qo'llanilayotgani yuzasidan keng muhokamalarga sabab bo'ldi.