Poytaxtimizda 5 iyun kuni O‘zbekiston tomoni raisligida Shanxay hamkorlik tashkiloti forumining 19-yig‘ilishi bo‘lib o‘tmoqda.
O‘zbekiston Prezidenti huzuridagi Strategik va mintaqalararo tadqiqotlar instituti tomonidan tashkil etilgan mazkur forum "Yangi sharoitlarda ShHTning roli: umumiy xavfsizlik, barqarorlik va farovonlik yo'lidagi sa'y-harakatlarni birlashtirish" mavzusida bo‘lib o‘tmoqda.
Unda dunyoning 10 mamlakatidan 40 dan ziyod ekspertlar, jumladan, ShHTga a'zo davlatlar milliy tadqiqot markazlarining vakillik delegatsiyasi, ShHTda kuzatuvchi davlatlar va tashkilotlarning muloqot bo'yicha hamkorlari mutaxassislari, ShHT Kotibiyati rahbariyati va ShHT Mintaqaviy aksilterror tuzilmasi Ijroiya qo‘mitasi rahbariyati ishtirok etmoqda.
Forumning ochilishida so‘zga chiqqan Strategik va mintaqalararo tadqiqotlar instituti direktori Eldor Aripov ShHT forumi faoliyatini yuqori baholadi.
U ShHT forumi o‘zini samarali ekspert va tahliliy platforma sifatida namoyon etganini ta’kidladi. Yirik “ShHT oilasi”ning barcha mamlakatlari – aʼzo davlatlar, kuzatuvchilar va muloqot boʻyicha hamkorlar vakillarining ushbu formatda ishtirok etishi hozirgi sharoitda bu yoʻlda oʻzaro hamkorlikni yanada kengaytirish masalasi tobora ommalashib borayotganidan dalolat beradi.
Institut rahbari ta’kidlaganidek, yangi tahdidlarga samarali javob berish uchun ShHT faoliyatini uzoq yillar davomida deyarli o‘zgarmagan faoliyat tartibini yangi sharoitlarga moslashtirishga ob’ektiv zarurat borligi ayon bo‘ldi.
Shu munosabat bilan, Eldor Aripovning soʻzlariga koʻra, Ostonada boʻlib oʻtadigan ShHT sammitini inobatga olgan holda, asosiy eʼtiborni quyidagi masalalarni muhokama qilishga qaratish zarur.
Birinchisi, inklyuziv muloqotni davom ettirish. Shu nuqtai nazardan, barcha darajadagi, jumladan, kuzatuvchilar va hamkorlarni faol jalb etgan holda keng va muntazam muloqot mexanizmlarini ishlab chiqish, dolzarb muammolar va yuzaga kelayotgan masalalarni inklyuziv va har tomonlama ko‘rib chiqish hamda hal etishni ta’minlash muhimligi ta’kidlandi.
Ikkinchisi, Strategik va mintaqalararo tadqiqotlar instituti rahbarining fikricha, barcha sohalarda kontseptual hujjatlarning amalda tatbiq etilishini ta'minlash mexanizmlari samaradorligini oshirishdan iborat. Shu bilan birga, transport-logistika, savdo va sarmoya, sanoat kooperatsiyasi va oziq-ovqat xavfsizligi kabi ommabop yo‘nalishlarga alohida e’tibor qaratish lozim.
Uchinchidan, ekspertning fikricha, ShHT oliy organlari faoliyatini axborot-tahliliy qo‘llab-quvvatlashning amaliy ta’sirini oshirish.
Tadbir kun tartibi ShHT doirasidagi hamkorlikning ustuvor yo'nalishlariga bag'ishlangan uchta — asosiy sessiya, zamonaviy rivojlanish bosqichida ShHT samaradorligini oshirish va SHHT forumi faoliyatini takomillashtirish istiqbollari muhokamasini o'z ichiga oladi.
Forum yakunida ShHTga a'zo davlatlarning tadbir kun tartibidagi masalalar bo'yicha yondashuv va qarashlari aks etgan yig'ilish Bayonnomasi imzolanadi.