Jarkenbek Nasiola XXRning Shinjon-Uyg‘ur avtonom rayoni Chanszi shahrining Ashili qozoq volostidagi Jamoat madaniy xizmatlar markazida faoliyat yuritadi. U Tyanshan tog‘lari etagida voyaga yetgan. 1996-yilda Chanszi okrugidagi qishloq xo‘jaligi mexanizatsiyasi texnikumini tamomlab, tug‘ilib-o‘sgan joyiga qaytgan.
Musiqa uning faoliyatining muhim qismiga aylandi. U ko‘p yillar davomida madaniy tadbirlarni tashkil etib, volost aholisi, jumladan, olis yaylovlarda yashovchi chorvadorlar oldida chiqish qilib kelmoqda.
Ko‘plab mahalliy aholi Jarkenbekning qarindoshlarining aksariyati xorijda yashashini biladi. Shunga qaramay, u umrining katta qismini Ashili volostida o‘tkazgan va bu yerda uni kattalar ham, qishloqdoshlari ham yaxshi taniydi. U mahalliy bayramlarda qatnashadi, chiqishlarni tashkil etadi va o‘zi ham sahnaga chiqadi. O‘tgan o‘ttiz yilni yodga olar ekan, Jarkenbek musiqa orqali odamlarga yaqinroq bo‘lishga harakat qilganini aytadi.
Taxminan 2003-yilda u kooperativ tibbiy sug‘urta siyosatiga oid ma’lumotlarni qo‘shiqlarga moslab, chorvadorlar uchun do‘mbira jo‘rligida ijro eta boshladi. Shu tariqa "Darxon" targ‘ibot guruhi tashkil topdi. Jamoa yaylovma-yaylov yurib, yangi chora-tadbirlar haqida qo‘shiq va sahna ko‘rinishlari orqali ma’lumot bera boshladi.
2009-yilda jamoaga Janibek Saylik qo‘shildi. O‘sha paytda u guruhning eng yosh a’zosi edi. Uning aytishicha, Jarkenbek qo‘shiq yaratish, shuningdek, boshqa tillardagi asarlarni mahalliy tinglovchilar uchun moslashtirish mahoratiga ega.
Avvallari jamoa a’zolari xitoy tilidagi qo‘shiqlarning mazmunini yaxshi tushunishmasdi. Jarkenbek ularni qozoq tiliga moslashtirgach, qo‘shiqlarning mazmuni mahalliy aholi uchun ancha tushunarli bo‘ldi.
Vaqt o‘tishi bilan "Darxon" jamoasi uch tilda — putunxua, mahalliy sheva va qozoq tilida qo‘shiqlar ijro eta boshladi. O‘ttiz yil davomida jamoa ikki mingdan ortiq safar uyushtirib, qariyb yarim million nafar chorvador oldida chiqish qildi.
Jarkenbek hanuz qo‘shiq yozish va ijro etishda davom etmoqda. Uning so‘zlariga ko‘ra, yaylovlarda yashovchi aholi chiqishlarga ehtiyoj bildirayotgan ekan, u bu faoliyatini davom ettiradi. U musiqani hayot va mintaqada yuz berayotgan o‘zgarishlar haqida odamlarga hikoya qilishning muhim vositalaridan biri sifatida ko‘radi.
