foto: Bosh prokuratura
Surxondaryoning ikkita tumanida joylashgan arxeologik yodgorliklar fuqarolar va xususiy korxona tomonidan buzib tashlangan. Bu haqda Bosh prokuratura xabar bermoqda.
Prokuratura va Madaniy meros agentligi xodimlari tomonidan o‘tkazilgan nazorat tadbirlarida Surxondaryo viloyati, Denov tumanidagi V–VII asrlarga oid “Qorabog‘tepa-1” arxeologik yodgorligining 585 metr kub maydoni fuqaro S.S. va M.S. tomonidan uy-joy qurish maqsadida tekislab yuborilib, yodgorlikka 19,3 mlrd so‘mlik zarar yetkazilgan.
Shuningdek, Sariosiyo tumanidagi miloddan avvalgi III–I asrlarga oid “Hayvontepa” arxeologiya yodgorligining 3 500 metr kub maydoni “M.I.S” xususiy korxonasi tomonidan issiqxona qurish maqsadida buzilib, yodgorlikka 208,1 mlrd so‘mlik zarar yetkazilgan.
Hozirda aniqlangan holatlar yuzasidan jinoyat ishi qo‘zg‘atilib, nazorat tadbirlari davom ettirilmoqda.
Bosh prokuraturaning qayd etishicha, mazkur jinoiy qilmishlar qonunchilikka asosan og‘ir jinoyat hisoblanib, aybdor shaxslarga nisbatan 7 yilgacha ozodlikdan mahrum qilish jazosi qo‘llanadi.